एक सनकीले गर्दा चार नेपालीको ज्यान गयो
राष्ट्रसंघीय कार्यालयमा आक्रमणपछि घाइतेलाई ओसार्दै गरेका अफगानीहरु। फोटो साभारः रोयटर्स
घटनाको विरोधमा उत्तेजित भीडले अफगानिस्तानको मजारे सरिफमा रहेको संयुक्त राष्ट्र संघको भवनमा आक्रमण गरे। अनि १० विदेशीको हत्या गरे। ती मध्ये चार जना नेपाली (कुनै कुनै मिडियाले पाँच पनि भनेका छन्) रहेछन् राष्ट्रसंघको कार्यालयमा सुरक्षा गार्डका रुपमा कार्यरत। उनीहरुको नाम सार्वजनिक भएको छैन। क्रुर घटनाको वर्णन डरलाग्दो छ- दुई जनाको टाउकै काटेका रहेछन्।
यिनले गर्दा हो सब भएको
टेरी जोन्स इभान्जेलिकल पादरी हुन्। सेप्टेम्बर ११ मा अमेरिकामा भएको आतंकवादी आक्रमणको नवौँ वार्षिकीमा २०० प्रतिभन्दा बढी कुरान जलाउने घोषणा उनले गरेका थिए। त्यसो गर्दा विश्वव्यापी रुपमा विरोध हुन्छ र विशेष गरी अफगानिस्तानमा हुने विरोधले हिंसा भड्काएर अमेरिकीहरुको ज्यान जोखिममा पार्न सक्ने चेतावनी अफगानिस्तानमा रहेको विदेशी फौजका कमान्डरले दिए। त्यसपछि उनले त्यो कार्यक्रम फिर्ता लिएको घोषणा गरेका थिए। पछि यी सनकीले कार्यक्रम फिर्ता लिएको कहाँ हो र स्थगित मात्रै गरेको भने। अनि मार्च २० तारिखमा यिनले सडक इजलास बसेर त्यसको न्यायाधीश बनी कुरानलाई मृत्युदण्डको फैसला सुनाए। उनको डोभ वर्ल्ड आउटरिच सेन्टरमा कुरान जलाउँदा जम्मा ३० जना मात्रै उपस्थित थिए। अमेरिकी र विश्वका मिडियाले यसलाई खासै महत्त्व दिएका थिएनन्। तर अमेरिकाविरोधी भावना प्रवल रहेको मुस्लिम देशहरु पाकिस्तान र अफगानिस्तानमा यसको चर्को विरोध भयो। त्यहाँका मिडियाले यसलाई निकै प्राथमिकता दिएर प्रसारण गरे। दुवै देशका नेताहरुले भाषणै गरेर यसको विरोध गरेपछि इन्टरनेट र टेलिभिजन नभएकाहरुले पनि घटनाबारे थाहा पाए। अनि शुक्रबारे प्रार्थनामा भेला भएकाहरुको आक्रोशित भीड कुरान जलाउने इसाईहरुसित बदला लिन अघि बढ्यो। तर मारिनेहरुमा परे नेपाली गार्ड र युरोपेलीहरु।
यसरी भएको थियो आक्रमण- भिडियोः टोलोटिभी
यसरी भएको थियो आक्रमण- भिडियोः च्यानलफोर न्युज
यो घटना दुई धार्मिक अतिवादीहरुको अन्धो धर्मप्रेमको परिणाम हो। इसाई र मुस्लिमहरुबीचको आफै सर्वश्रेष्ठको होडबाजीको नकारात्मक परिणाम हो। जसको शिकार हामी जस्ता दुवैको होडबाजीमा नपर्नेहरु भइरहेका छौँ।
वास्तवमा शुद्ध धर्मले कट्टरपना सिकाउँदैन। धर्मको शुद्ध रुपले एकअर्कामा माया, प्रेम, स्नेह फैलाउने कुरामात्र सिकाउँछ। बाँकी कुराहरु सबै धर्मका ठेकेदार भनाउँदाहरुले थपेका हुन्। मात्राको फरक मात्र हो, सबै धर्मका ठेकेदारहरुले त्यसो गरेका छन्। इसाई र मुसलमान धर्मका खराब ठेकेदारहरु तुलनात्मक रुपमा बढी छन्। अब हेर्नुस् न, किन त्यो सनकी पादरी टेरी जोन्सलाई अर्काको पवित्र धर्मग्रन्थ जलाएर विरोध गर्नुपरेको ? अब यत्रो घटना भयो नि हैन ? यही चाहेको उसले ? चार नेपालीसहित १० विदेशीको ज्यान जाने कारण बनेर उनी खुब ठूलो भए होलान् हैन ?
यता मान्छे नै मारेर हिंसात्मक प्रदर्शन गर्न उक्साउने अफगानिस्तानका तीन मुल्लाहहरु पनि कम दोषी छैनन्। एक ठाउँको मान्छेले एक थोक जलाउँछ, अनि त्यसको बदला त्यो घटनासँग सम्बन्धित नै नभएकोहरुसँग लिने ? येशु र मोहम्मद पनि आकाशमा बसेर टाउकोमा हातले पिटीपिटी दुःख मनाइरहेका होलान्, मेरो नाममा यो के गरिरहेका छन् मेरा चेलाहरुले भन्दै।
यदि हामी मानव हौँ भने दुवै कट्टरपनाको विरोध गर्छौँ। इसाईले पनि आफ्नो धर्मको बदनाम गर्ने टेरी जोन्सको विरोध गर्नुपर्छ, मुसलमानले पनि धर्मान्ध भएर गरेको हत्याको विरोध गर्नुपर्छ।
No comments:
Post a Comment