विश्वका उत्कृष्ट बीस महिलाको सूचीमा गोमा
अविनाश चौधरी

धनगढी, चैत ४ गते । विश्वका उत्कृष्ट २० महिलाको सूचीमा नेपालको तर्फबाट कैलालीकी मानवअधिकारकर्मी गोमा आचार्य पर्नुभएको छ ।

अन्तर्राष्ट्रिय नारी दिवसको अवसर पारेर केयर इन्टरनेशनलले सार्वजनिक गरेको सूचीमा आचार्यसमेत पर्नुभएको हो । महिलाको सवालमा अधिकारमुखी कार्य गरेबापत उहाँलाई २० उत्कृष्ट महिलाको सूचीमा राखिएको हो ।


अन्य उत्कृष्ट महिलामा म्यान्माकी आङ सान सुकी, भारतकी अनासुयमा लानुसा र इला भट्ट, चीनकी काङ टु ची, पाकिस्तानकी आस्मा जहागीरलगायतका रहेका छन् ।

कैलालीकी आचार्यलाई पुरुषसरह महिलालाई ज्याला दिलाउन, नेपालको सुदूरपश्चिममा व्याप्त छाउपडी प्रथाको अन्त्य गर्न र एकल महिलाको अधिकार स्थापनाका लागि नेतृत्वदायी भूमिका निर्वाह गरेको कारण विश्वका उत्कृष्ट महिला सूचीमा छनोट गरिएको केयर नेपालले जनाएको छ ।

आफू आङ सान सुकी जस्ता विश्वका उत्कृष्ट महिला सूचीमा परेकोप्रति खुसी प्रकट गर्दै आचार्यले महिला अधिकारको क्षेत्रमा गरिरहेको कार्यका लागि अझ थप हौसला मिलेको बताउनुभयो ।

धनगढीमा बस्दै आउनुभएकी आचार्य राष्ट्रिय महिला अधिकार सरोकार मञ्च र महिला पैरवी मञ्चको केन्द्रीय सदस्य हुनुहुन्छ । सरोकार मञ्च नेपालका ३७ जिल्लामा रहेको महिला अधिकार क्षेत्रमा क्रियाशील संस्थाहरूको सङ्गठित समूह हो ।

विद्यार्थी जीवनकालदेखि राजनीतिमा सक्रिय आचार्य विगत १० वर्षयता महिला अधिकारको क्षेत्रमा सक्रिय रहनुभएको छ ।